Sekretari i Përgjithshëm i NATO-s, Mark Rutte, ka deklaruar se aktualisht nuk ekziston asnjë kërcënim i menjëhershëm ndaj territorit të NATO-s, pavarësisht shqetësimeve të fundit për mundësinë e një përshkallëzimi të tensioneve me Rusinë, veçanërisht në rajonin e Baltikut.
Në një intervistë për Euronews, Rutte u pyet lidhur me një letër që Rusia dyshohet se i ka dërguar NATO-s, në të cilën, sipas raportimeve në media, Moska paralajmëronte se do të përdorte të gjitha kapacitetet e saj, përfshirë armët bërthamore, në rast se territori rus, përfshirë Kaliningradin, do të kërcënohej.
Rutte tha se nuk ishte në pozitë të zbulonte përmbajtjen e letrës, por konfirmoi se NATO kishte reaguar ndaj saj.
“Unë nuk jam në pozitë të zbuloj se çfarë na kanë dërguar, por kjo është ajo që ata kanë raportuar pak a shumë në media. Ne reaguam dhe në thelb thamë: ‘Ne jemi një aleancë mbrojtëse. Ndaloni kërcënimet bërthamore. Kjo nuk është aspak e nevojshme dhe nuk ndihmon. Dhe veçanërisht ndaloni luftën në Ukrainë, e cila është një luftë e paprovokuar agresioni kundër Ukrainës’”, deklaroi Rutte.
I pyetur nëse kërcënimi për përdorimin e armëve bërthamore kundër vendeve baltike është tashmë real, Rutte u përgjigj se nuk e konsideron një skenar të tillë si kërcënim aktual.
“Jo, nuk është. Putini e di se ai kurrë nuk mund ta mposhtë NATO-n. Prandaj, unë nuk e marr këtë aq seriozisht, por natyrisht që duhej t’i përgjigjeshim dhe t’ia bënim të qartë se NATO është një aleancë mbrojtëse”, tha ai.
Rutte theksoi se NATO është “shumë më e fortë” se Rusia dhe se Moska nuk mund ta mposhtë Aleancën.
Rutte: Nuk ka kërcënim të menjëhershëm ndaj territorit të NATO-s
Duke folur për shqetësimet në vendet baltike dhe në Poloni, Rutte tha se NATO është e përgatitur për çdo skenar.
“Nuk ka kërcënim të menjëhershëm ndaj territorit të NATO-s. Nëse ka grumbullim forcash, ne do ta shohim dhe do të merremi me të. Nëse ndodh diçka tjetër, do të merremi edhe me të, sepse jemi përgatitur dhe trajnuar për këtë”, deklaroi ai.
Rutte tha se NATO ka një strukturë të përbashkët komanduese dhe se 32 aleatët janë duke punuar së bashku.
“Ne jemi në formë perfekte, si për sa i përket kërcënimeve hibride, ashtu edhe për çfarëdo që mund të ndodhë më tej”, tha ai.
Sipas Rutte, Rusia po përpiqet që përmes kërcënimeve dhe aktiviteteve hibride në zonën gri të krijojë përçarje brenda NATO-s dhe të zhvendosë vëmendjen nga lufta në Ukrainë.
“Putini dëshiron të na përçajë. Ai dëshiron që ne ta humbim vëmendjen kur bëhet fjalë për Ukrainën. Ne nuk do ta bëjmë këtë”, tha Rutte.
Ai shtoi se çdo kërcënim hibrid ndaj një vendi të NATO-s do të pasohet me më shumë mbështetje për Ukrainën dhe jo me më pak.
“43 mijë rusë vriten ose plagosen rëndë çdo muaj”
Rutte foli edhe për situatën në Ukrainë, duke deklaruar se Rusia nuk po arrin objektivat e saj në luftë.
“43 mijë rusë vriten ose plagosen rëndë çdo muaj në Ukrainë. Ukraina po mban vijën e frontit dhe po bën shumë më mirë se gjashtë muaj apo një vit më parë. Ajo po godet thellë brenda Rusisë”, tha ai.
Sipas tij, Ukraina po përballet me probleme serioze në mbrojtjen ajrore, veçanërisht për shkak të sulmeve ruse ndaj qyteteve dhe infrastrukturës energjetike.
“Ka mungesë të interceptorëve dhe kjo do të thotë se evropianët dhe amerikanët po punojnë së bashku për t’i dërguar Ukrainës sa më shumë që të jetë e mundur”, tha Rutte.
Ai u bëri thirrje vendeve evropiane që kanë interceptorë Patriot në rezervat e tyre të vlerësojnë se çfarë mund të dërgojnë në Ukrainë, duke theksuar se këto sisteme janë thelbësore për shpëtimin e jetëve.
Megjithatë, Rutte sqaroi se aleatët nuk mund t’i dërgojnë të gjitha rezervat e tyre, pasi duhet të ruajnë kapacitetet e nevojshme për mbrojtjen e territorit të NATO-s.
“Ukraina po bën më mirë se gjashtë muaj më parë”
Rutte tha se, pavarësisht sulmeve të rënda ruse ndaj qyteteve dhe infrastrukturës energjetike, Ukraina po performon më mirë në vijën e frontit.
“Ukraina nuk po bën më keq se disa kohë më parë. Ajo po bën më mirë, sepse në vijën e frontit dhe në goditjet e thella brenda Rusisë, po bën shumë më mirë se gjashtë muaj më parë”, deklaroi ai.
Ai përmendi veçanërisht zonën e Donetskut, Slovianskut dhe Kramatorskut, si dhe sulmet ukrainase ndaj sistemeve logjistike dhe infrastrukturës energjetike ruse.
Rutte për Iranin: SHBA-ja ishte e vetmja që mund ta godiste kapacitetin bërthamor
Gjatë intervistës, Rutte u pyet edhe për ndikimin e luftës në Iran në situatën në Ukrainë.
Ai deklaroi se, sipas tij, vetëm Shtetet e Bashkuara ishin në gjendje të neutralizonin kapacitetin bërthamor të Iranit.
“Vetëm Shtetet e Bashkuara ishin në gjendje të eliminonin kapacitetin bërthamor të Iranit, i cili ishte një kërcënim potencial jo vetëm për Izraelin dhe Lindjen e Mesme, por edhe për ne këtu në Bruksel”, tha Rutte.
Ai vlerësoi se ndërhyrja amerikane kishte degraduar këtë kapacitet dhe theksoi se vendet evropiane duhet të rrisin kapacitetet e tyre të mbrojtjes.
Rutte tha se rritja e shpenzimeve evropiane për mbrojtjen, përfshirë objektivin prej 3.5 për qind dhe deri në 5 për qind të shpenzimeve të përgjithshme të lidhura me mbrojtjen, synon që Evropa të marrë më shumë përgjegjësi për sigurinë e saj.
“Ne duhet të jemi në gjendje ta bëjmë këtë vetë. Kjo është pikërisht ajo për të cilën po punojmë”, tha ai.
Në fund, Rutte përsëriti mesazhin e tij për situatën aktuale: qetësi, vazhdim i investimeve në mbrojtje dhe vazhdim i mbështetjes për Ukrainën./Radar Report.
Recent Comments