Gjatë qëndrimit në New York, kryeministri i Kosovës, Albin Kurti, është takuar me të Dërguarën e Posaçme të Mbretërisë së Bashkuar për Ballkanin Perëndimor, Dame Karen Pierce.
Sipas njoftimit, gjatë takimit Kurti e ka falënderuar Pierce për qëndrimin e qartë të Mbretërisë së Bashkuar kundër glorifikimit të kriminelëve të dënuar të luftës.
Kryeministri ka vlerësuar gjithashtu mbështetjen e vazhdueshme të Mbretërisë së Bashkuar për sovranitetin, pavarësinë dhe integritetin territorial të Kosovës.
Në takim është diskutuar edhe çështja e ish-drejtuesve të Ushtrisë Çlirimtare të Kosovës. Kurti ka shprehur shqetësimin e tij lidhur me dënimet e dhëna në shkallën e parë nga Dhomat e Specializuara të Kosovës, të cilat i ka cilësuar si të rënda dhe të padrejta.
Takimi është zhvilluar në kuadër të qëndrimit të kryeministrit Kurti në New York, ku po merr pjesë në aktivitetet dhe takimet e zhvilluara në margjinat e Asamblesë së Përgjithshme të Kombeve të Bashkuara.
Recent Comments