Policia e Kosovës ka kontrolluar shtëpinë e të dyshuarit për vrasjen e Arlinda Zekajt, Albert Sylaj në fshatin Vitomiricë të Pejës, ku ka gjetur dhe sekuestruar armë, municion dhe mjete të tjera.
Sipas raportit 24-orësh të Policisë së Kosovës, kontrolli është kryer më 25 tetor 2026, në kuadër të rastit të evidentuar si “Vrasje e rëndë”.
“Lidhur me rastin, gjatë kontrollit të shtëpisë së të dyshuarit mashkull kosovar, është gjetur dhe sekuestruar: një pushkë gjuetie, 153 fishekë, disa karikatorë, disa pajisje të armës, tri thika, një bajonetë, 115 gëzhoja dhe një sëpatë”, thuhet në raportin e Policisë së Kosovës.
Të dielën mbrëma, Arlinda Zekaj u vra me sëpatë nga ish-kunati i saj, Albert Sylaj, disa minuta pasi ishte kthyer nga stacioni i policisë.
Dy ditë pas kësaj ngjarje të rëndë, i dyshuari vazhdon të mbetet në arrati.
Të hënën, Policia e Kosovës e shpalli në kërkim të njëjtin, derisa ende nuk ka informacione nëse Albert Sylaj është lokalizuar nga autoritetet.
Arlinda do të varroset sot në orën 15:00, në fshatin Radac të Pejës. Ndërkaq pas vrasjes së Arlinda Zekajt, të mërkurën është thirrur protestë kombëtare.
Policia e Kosovës ka shpallur dje në kërkim Albert Sylajn, i dyshuar për veprën penale “Vrasje e rëndë”.
Sipas njoftimit të Drejtorisë Rajonale të Policisë në Pejë, shpallja e tij në kërkim është bërë me autorizimin e Prokurorisë Themelore në Pejë, me qëllim të lokalizimit dhe arrestimit të tij.
I dyshuari Albert (Sylejman) Sylaj ka lindur më 12 dhjetor 1984 në Deçan.
Policia ka kërkuar bashkëpunimin e qytetarëve, duke ftuar të gjithë ata që kanë informacione për vendndodhjen e tij që të njoftojnë Policinë e Kosovës ose të paraqiten në stacionin më të afërt policor.
Recent Comments