MITROVICË – Tre persona kanë mbetur të lënduar si pasojë e një aksidenti trafiku që ka ndodhur rreth orës 19:50, në rrugën nacionale Mitrovicë–Bernjak, te tuneli i Pestit.
Lajmin për Radar Report e ka konfirmuar Munish Avdiu, drejtor i Departamentit të Trafikut Rrugor të Policisë së Kosovës për rajonin e veriut.
Në aksident janë përfshirë një veturë Volkswagen Polo me targa të Beogradit (BG) dhe një automjet i Doganës së Kosovës.
Sipas drejtorit Avdiu, dyshohet se drejtuesi i veturës me targa BG nuk e ka mbajtur distancën e nevojshme dhe e ka goditur automjetin e Doganës në pjesën e pasme.
“Drejtuesi i automjetit me targa BG nuk e ka mbajtur distancën e nevojshme dhe e ka goditur automjetin e Doganës në pjesën e pasme”, ka deklaruar Munish Avdiu për Radar Report.
Si pasojë e përplasjes, lëndime kanë pësuar dy zyrtarë doganorë dhe drejtuesi i veturës me targa BG.
Të lënduarit janë dërguar për trajtim mjekësor. Sipas informacioneve të konfirmuara, asnjëri prej tyre nuk është në rrezik për jetë.
Rrethanat e aksidentit janë duke u trajtuar nga autoritetet kompetente.
Recent Comments